Дзень роднай мовы адзначылі акцыяй «Чытаем разам»

Ведаць і любіць родную мову ў нашай краіне вучаць з дзяцінства. І хай сёння не кожны размаўляе па беларуску ў паўсядзённым жыцці, мова для нас – вялікае багацце і гісторыя. Гэта добра ведаюць вучні сярэдняй школы № 11. Міжнародны дзень роднай мовы хлопчыкі і дзяўчынкі правялі ў абласной бібліятэцы. У межах акцыі «Чытаем разам» дзеці агучылі вытрымкі з твораў народных пісьменнікаў Івана Шамякіна, Андрэя Макаёнка, Івана Навуменкі, а таксама Івана Мележа. Акрамя таго, вучні паўдзельнічалі ў віктарыне па творчасці знакамітых землякоў

Сюрпрызам для дзяцей стаў візіт жывога класіка, члена саюза пісьменнікаў Беларусі, уладальніка шматлікіх прэмій у галіне літаратуры Васіля Ткачова. Ён распавёў школьнікам пра свой творчы шлях, а таксама падарыў музею аддзела краязнаўства зборнік сваіх лепшых твораў.